DOUB KOT , FRODE EK GRAMOUN.
Koko-doub-kot , zot i koné ? Non ? Alors lès amoin rakont azot son zistoir.
Mésié Galon lété in om vayan é dan son zénès li té i préfèr rofiz in pla manzé pito k’fout in kou. E pa rien k’ène foi , li lavé rotrous la mans semiz pou galiz palto ansanb zène zan kom li. E la pa moin vré ke pou sobat , li lavé in bon gou d’sèl , sirtou gras son kou d’talon zirondèl…Episa in zour , Galon la rankont in zène fiy èk in sourir pli dou ke siro-la-kuit…Li la marié é di zour o landmin li la arèt doungué pou in oui pou in non…Mé dan lo fon mèm , li té i kontinié ador batay. Alor li té i mank pa alé voir lèrk dé zène zan té i désand si térin fotbal pou mézir sapo.
I fo dir ke dan s’tan-la , batay lété , kom ki diré ,
fé lo spor. Kank té i sobat , lété touzour san
lé zarm , episa san lantouraz pintad. An plis de sa , vinkèr
kom vinki té i réspèk ène a lot é té i
tienbo pa dann kèr. Sak foi in konba té fini , lo dé ladvèrsèr
té i sar la boutik boir in rak ansanb. Sé sa ke mesié Galon
té i èm. Alor , lèrk , madam Galon la tonb an voi d’famiy
pou promié foi , mesié Galon la prièr Bondié done
ali in garson kab pran son rolèv. Malérèsman lo zanfan
lété in fiy…E pandan dé-troi z’an lo momon
la rès kom in fanm tamann.
Sé-t-a s’moman-la ke mesié Galon la pran in métrès dan in ot vil é sad-la la pa tardé pou done ali in garson : Lo bonom lété éré : son léspoir té i roviv. Mé li la pa kit son madam marié pou sa. O kontrèr ! Li la kontinié èm aèl gro kom la kaz , é in zour lo sièl la rékonpans ali : Madam Galon la done nésans in pti baba mal : Koko - son vré non lété Anriko. Toudsuit , Mesié Galon lavé romarké ke lo marmay noré té dign de li : lo pti pat lété rofoulé kom dé maniok zava ; lo pti poin lété toultan férmé - Oila mon om !
E
parlfèt , koko la grandi é lé devni in léspès
lèrkil : li té i koné pa son fors. Paské son
papa té i guingn pa soulevé lèrk li té zène
, Koko té i manié sa a lèz. Toulmoun la di : « Koko
nana doub kot ». Rien k’domoun doub kot té i pé an-avoir
la fors kom sa. Mesié Galon la antropran lédikasion son garson
: i fo èm sobat , mé i fo touzour èt kèr fran
; in ladvèrsèr sé-t-in om kom lé zot ki fo
pa méprizé , ki fo pa , a tout fors , vouloir tié ; é sirtou
i fo pa anprofit son kouraz pou Abiz si lé zot…